Sabunçu rayonu, Kürdəxanı qəsəbəsi, Rəhim Əliyev, 86 ünvanında sakinlər elə bil gölün içində yaşayırlar. Bu haqda bu gün, 13 mart tarixində Bakuplus.az ARB-yə istinadən xəbər verir.
Sözügedən ərazidə kanalizasiya sistemi olmadığından yağıntılar olan kimi küçəni su basır. Yollar, həyətlər, zirzəmilər belə su ilə dolur. Küçədə nəinki piyadalar, avtomobillər belə hərəkət etməkdə ciddi çətinlik çəkir.
“Neçə ildir bu vəziyyətdəyik. Körpə uşaqlar, xəstə yaşlılar var. Sabah xəstəyə təcili tibbi yardım gəlsə, küçəyə girə bilməyəcək. Taksi gəlib saxlayır küçənin o başında, deyir: “Düşün, buradan gedin”. Belə vəziyyətdə yaşamaq olmur. Bakının mərkəzidir, şəhərin içidir. Xəstəlik mənbəyidir”, – deyə sakinlər şikayət edirlər.
Onlar bələdiyyə və qəsəbə nümayəndəliklərinə dəfələrlə müraciət etsələr də, məsələ öz həllini tapmayıb. Sakinlər öz ciblərindən də vəsait qoymağa razıdırlar, ancaq dövlət qurumları köməklik etməkdən imtina edir.
