Son günlər karqo şirkətlərinin xidmətlərindən yararlanan müştərilər çatdırılma servisindən narazıdırlar; ya bağlamadan aylarla xəbər çıxmır, ya da yerinə başqa məhsul göndərilir. Bu haqda bu gün, 7 dekabr tarixində Bakuplus.az ATV Xəbər-ə istinadən məlumat verir.
Bu halla üzləşənlərdən biri Südabə Quliyevadır: “Onlayn mağazaların birindən köynək sifariş etmişdim. İki ay müddətində gəlmədi, artıq üçüncü aya keçib. Bu problemlə təkcə mən yox, bir çoxları qarşılaşıblar. Bəzən elə hallar olur ki, hətta səhv məhsul göndərirlər”.
Təkcə özəl karqo şirkətləri yox, “Azərpoçt”un karqo xidməti vasitəsilə də məhsul sifariş vermək mümkündür. Qurumun xidməti keyfiyyətə nəzarət şöbəsinin müdiri Gülnaz Cəfərova bildirir ki, vətəndaşlar məhsulu təhvil alarkən yoxlamalıdırlar.
“Poçt göndərişinizi təhvil alarkən onun vizual görünüşü, çəkisi və sairə ilə bağlı tanış olursunuz və müvafiq sənədə imza ataraq onu təhvil alırsınız. Bu zaman poçt göndərişinizdə qarşılaşdığınız nöqsanlarla bağlı dərhal poçt şöbəsinə bildirməlisiniz. Belə olan halda əməkdaşlarımız tərəfindən dərhal akt tərtib olunur və bu akt əsasında göndərən ölkəyə yoxlama xəbərnaməsi ilə məlumat verilir. Bu da o deməkdir ki, artıq göndərən ölkə göndərici qarşısında məsuliyyət daşımalı olur”, – deyə Cəfərova bildirib.
Onlayn sifarişlərə tələbatı görən bəzi dələduzlar isə boş dayanmırlar. Ötən gün vətəndaşa telefon qablaşdırmasında bolt göndərən işbazların videosu sosial şəbəkələrdə müzakirəyə səbəb oldu. Bəs belə olan halda vətəndaş nə etməlidir?
Vəkil Mircavid Miriyevin sözlərinə görə, qanunvericilikdə istehlakçıların malları və xidmətləri sərbəst sürətdə seçmək, eyni zamanda həmin mal və xidmətlərlə bağlı onların lazımi keyfiyyətdə olmasını tələb etmək və mallara və xidmətlərə dolayı dəymiş zərərin əvəzinin ödənilməsini tələb etmək hüquqları var. Bu hüquqlardan istifadə edərək müştərilər müvafiq səlahiyyətli dövlət orqanlarına və ya məhkəmələrə müraciət edə bilərlər. Bu halda vətəndaş həmin məhsulu qüsurlu olduğuna görə karqo şirkətinə geri qaytara bilər. Əgər karqo şirkəti həmin məhsulu qəbul etməkdən imtina edərsə, o zaman vətəndaşlar müvafiq icra hakimiyyəti orqanlarına müraciət edə bilərlər.
Mütəxəssislər tövsiyə edirlər ki, istər xarici, istərsə də yerli saytlardan məhsul alarkən ətraflı araşdırma edilsin. Bundan başqa, bahalı əşyaların alışı məqsədəuyğun deyil.
