Bakının Nizami rayonunun “Koroğlu” metro stansiyasının yaxınlığında tezliklə taksi avtomobilləri üçün nəqliyyat mübadilə mərkəzi istismara veriləcək. Bu haqda bu gün, 19 iyul tarixində Bakuplus.az Azərbaycan Yerüstü Nəqliyyat Agentliyinin (AYNA) sədri Anar Rzayevə istinadən məlumat verir.
Sərnişinlərin ictimai nəqliyyat növləri arasında rahat keçidinin təmin olunması məqsədilə ərazidə avtobus, metro, dəmir yolu stansiyası, taksi duracağı, ictimai və fərdi nəqliyyat qovşağını əlaqələndirəcək multimodal mərkəz nəzərdə tutulub.
Həmin ərazidə bu kimi yeniliklər nəzərdə tutulub:
- Metro stansiyasının cənub çıxışında (Milli Gimnastika Arenasının qarşısı) dəmir yolu stansiyasına yaxın 3 perronlu avtobus dayanacağı yaradılacaq;
- minik avtomobilləri üçün “park and ride” tipli parklanma yerləri təşkil ediləcək;
- taksi minik avtomobilləri üçün yolun hərəkət hissəsinə yaxın duracaq yaradılacaq;
- elektrik mühərrikli avtobuslar üçün dolum məntəqələri quraşdırılacaq.
Rzayev onu da qeyd edib ki, taksi fəaliyyətinin təkmilləşdirilməsi məqsədilə sürücülər üçün nəzərdə tutulmuş təlimlər davam edir. 25 min sürücüdən 23 mini təlimlərdən sonra imtahanlardan uğurla keçib.
