Lökbatan bazarında nöqsanlar aşkarlanıb. Bu haqda bu gün, 6 iyun tarixində Bakuplus.az Qida Təhlükəsizliyi Agentliyinə istinadən xəbər verir.
Lökbatan qəsəbəsi, 28 May küçəsi, ev 7 ünvanında fəaliyyət göstərən bazarda aparılan yoxlamalar zamanı obeyktdə sanitar-gigiyenik və sanitar-texniki vəziyyətin qənaətbəxş olmadığı, qida təhlükəsizliyi sahəsində texniki-normativ-hüquqi aktların tələblərinin pozulduğu aşkar edilib.
Belə ki, satışa təqdim edilən bir sıra qida məhsullarının mənşəyinin məlum olmadığı və düzgün etiketlənmədiyi, temperatur rejiminə və mal qonşuluğu prinsipinə riayət olunmadığı, müvafiq avadanlıqlarla təmin edilmədiyi, ət məhsullarının açıq havada saxlanıldığı, işçilərin dövri tibbi müayinədən keçirilmədiyi və gigiyenik təlimlərə cəlb olunmadığı,mütəmadi təmizlik işlərinin aparılmadığı müəyyən olunub. Həmçinin bazarın satış sahəsinin, xüsusilə ət satışı nöqtələrinin döşəməsinin tamlığının pozulduğu, bazarın daxilində fəaliyyət göstərən kafedə qida məhsullarının yuyulması üçün yuma çanağının təmin edilmədiyi, qida məhsulları ilə təmasda olan səthlərin asan yuyulub-təmizlənə bilən materiallardan təşkil olunmadığı aşkarlanıb.
Faktlarla bağlı sahibkarlar məsuliyyətə cəlb olunublar.
