Bakının Qaradağ rayonu, Lökbatan qəsəbəsi, 28 May küçəsində yaşayan sakinlər söküləcək evlərindən çıxmağa razı deyillər. Bu haqda bu gün, 29 noyabr tarixində Bakuplus.az İctimai TV-yə istinadən xəbər verir.
Ötən əsrin ortalarında tikilən ikimərtəbəli binaların söküləcəyi deyilir, lakin sakinlər bununla bağlı narazılığını bildirirlər. Bir neçə gün əvvəl evlərə baxış keçirildiyi və vətəndaşlara bu tikililərin söküləcəyi bildirilib. Sakinlər evlərinin sökülməsi ilə razı olsalar da, tikinti şirkətlərinin onlara təklif etdiyi şərtlərlə razılaşmırlar.
Sakinlər tələb edirlər ki, onlara evləri ilə eyni sahədə mənzillər verilsin. Onlar orada yaşadıqları bütün müddət ərzində mənzillərə artırmalar ediblər və bunun nəzərə alınmasını istəyirlər.
Mənzil Kommunal İstismar İdarəsinin baş mühəndisi Kamal Mirzəyevin sözlərinə görə, rayonda hazırda 215 qəzalı bina var. O bildirib ki, ünvanlara baxış keçirilsə də, binaların sökülməsi və kompensasiya ödənilməklə sakinlərin köçürülməsi ilə bağlı hələ qərar verilməyib.
