Paytaxtın Qaradağ rayonu, Lökbatan qəsəbəsi, 6-cı massiv adlanan ərazidə yollar bərbad vəziyyətdədir. Bu haqda bu gün, 9 may tarixində Bakuplus.az ATV-yə istinadən xəbər verir.
Sakinlərin sözlərinə görə, göydən damcı su düşən kimi yollarda gölməçələr yaranır. Buna səbəb isə kanalizasiya sisteminin olmamasıdır.
“Yağış yağan kimi bütün lüklərdən fəvvarə vurur. Bütün su da bir yerə yığılır, iydən dayanmaq olmur”, - deyə sakinlər şikayət edirlər.
Bundan əlavə, massivdə içməli su da yoxdur. Sakinlər ayda 2-3 dəfə maşın çağıraraq su alırlar. Maraqlısı odur ki, bir neçə metr aralıqda kanalizasiya da mövcuddur, içməli su da.
“Yanımızda asfalt çəkdilər. Biz dedik: “Bizə niyə çəkmirsiniz?” Cavab verdilər: “Sizdə asfalt var”. Halbuki yollar bərbad vəziyyətdədir”.
“Azərsu”dan məsələ ilə bağlı bildiriblər ki, sözügedən massivin yarısında içməli su və kanalizasiya yoxdur. Həmin ərazilərdə yenidənqurma işlərinin aparılması nəzərdə tutulub. İcra Hakimiyyəti də yolların təmir olunmasının planlaşdırıldığını qeyd edib.
[caption id="attachment_99721" align="alignnone" width="640"]
Foto ATV[/caption]
