Bir neçə gündür küçədə gecələyən professor Fazil Qaraoğlu ilə bağlı məsələ Heydər Əliyev Fondu tərəfindən nəzarətə götürülüb.
Fond alimin 1 illik kirayə haqqını ödəyəcəyini bildirib.
14:42 - Çöldə qalan alim haqda yeni xəbər var
Nigar Köçərli çöldə qalan professoru ziyarət edib. Bu haqda bu gün, 1 aprel tarixində Bakuplus.az iş xanımına istinadən xəbər verir.
İş xanımının sözlərinə görə, alim acınacaqlı vəziyyətdədir və bu hal qəbuledilməzdir.
Professor Fazil İsmayılov 14 il Ankarada Gazi Universitetində çalışıb. Prezident Ərdoğanın şəxsi tapşırığı ilə Osmanlı arxivlərində araşdırma aparmaq icazəsi alıb.
“Ermənilər və Həqiqətlər – sənədlərdə” mövzusunda ümumilikdə 5000 səhifədən çox 7 cilddə kitab yazıb və nəşr etdirib. Buna görə ermənilər onu ölümlə hədələməyə başlayıblar. Təhlükəsizliyini təmin etmək üçün Bakıya qayıdıb. 17 ildir kirayələrdə yaşayır.
Müqəddəs Quran kitabını ilk dəfə hər iki dilə, həm Azərbaycan, həm də rus dillərinə çevirən tək mütərcimdir.
Bu vaxta qədər Türkiyə Böyük Millət Məclisində çıxış edən 2-ci vətəndaşımızdır. Tərcümə etdiyi Quran kitabından 500 ədəd Heydər Əliyev Fonduna bağışlayıb.
Ensiklopedik biliyə sahib olan millətçi bir alimdir.
“Yaşadığı mənzilin kirayə haqqını verə bilmədiyindən atıblar küçəyə. İstədim özümlə aparım, hoteldə yer təklif etdim. “Əlyazmalarımı, illərcə topladığım sənədləri burada qoyub gedə bilmərəm”, – deyir. Artıq 4 gecədir küçədə gecələyir. İcra nümayəndəsi deyib: “Yer tap, köç, kirayənin yarı haqqını biz ödəyərik”, – deyə Nigar Köçərli qeyd edib.
“Mən bu müqəddəs Ramazan günlərində imkanlı şəxslərə səslənirəm, müqəddəs Quran kitabını iki dilə çevirən 77 yaşlı bir alimin küçədə ölməsinə imkan verməyin. Fazil bəy çox istiqanlı, elədiklərini gözə soxmayan, son dərəcə nəcib bir insandır. Amma bu nəcib insanı məhz elə bu gecə itirə bilərik.
Ona mütləq ev verilməlidir, o yaşamalıdır”, – deyə o, əlavə edib.
[video width="1080" height="1920" mp4="https://bakuplus.az/storage/photos/2024/04/bu_gec-_ol-_bil-rprofessor_fazil_qaraoglu_ismayilov_14_il_ankarada.mp4"][/video]
