Azərbaycanda ali təhsil müddətinin azaldılması planlaşdırılır. Bu haqda bu gün, 28 mart tarixində Bakuplus.az AzTV Xəbər-ə istinadən məlumat verir.
Bir çox başqa ölkələrdə universitet təhsili 3 il davam edir. Bunun üçün xüsusi təhsil sistemi də yaradılıb. Bu kimi sistemi Azərbaycan universitetlərinə tətbiq etmək olarmı?
Tələbələr arasında bu addım birmənalı qarşılanmayıb. Bəziləri 4-cü il təhsilin vaxt itkisi olduğunu, digərləri isə təhsil müddətinin ixtisasa görə dəyişəbilən olmasının daha yaxşı olacağını düşünür.
“4 il olsa, daha yaxşı olar, 3 il az müddətdir. Onsuz da 4-cü təhsil ilində praktika olur. Hətta 5 il oxusaq, daha yaxşı olardı. Belə olsa, praktiakaya da vaxt qalar”, – deyə tələbələrdən biri vurğulayıb.
Ekspertlərin fikirlərinə görə, təhsil müddətinin 3 ilə azaldılması vaxt itkisinin qarşısını alacaq.
Təhsil üzrə ekspert Rizvan Fikrətoğlu bildirib ki, humanitar sahələrdə, məsələn mədəniyyət, incəsənət, turizm sahələrində təhsil müddətini 3 ilə endirmək olar:
“Neft-qaz mühəndisi, yaxşı olar ki, 1 il və yaxud da 2 il neft-qazın nəzəriyyəsini Neft akademiyasında öyrənsin, sonra isə bu sahə üzrə praktikasını görsün”, – deyə o, qeyd edib.
Milli Məclisin deputatı Ceyhun Məmmədovun sözlərinə görə, yeni sistemə keçmək asan deyil.
“Dəyişikliklər etmək üçün öncə hazırlıq işləri görülməlidir ki, sonrakı dövrdə belə məsələləri nəzərdən keçirə bilək”, – deyə deputat fikrini bildirib.
Elm və Təhsil Nazirliyindən isə bildirilib ki, hazırda fərdi ixtisaslar üzrə təhsil müddətinin azaldılmasına dair müzakirələr aparılır.
