Bakının Sabunçu rayonu, Kürdəxanı qəsəbəsi, 8/10 ünvanında yerləşən, keçmiş məcburi köçkünlər üçün inşa edilən şəhərcikdə istilik yoxdur. Bu haqda bu gün, 24 noyabr tarixində Bakuplus.az ATV-yə istinadən məlumat verir.
4 il ərzində binada yaşayan sakinlər deyirlər ki, müəyyən müddət istilikdən ödənişsiz istifadə ediblər. Sonra məlum olub ki, borcları yaranıb. Müəyyən məbləğ ödəməklə vətəndaşlar problemi həll ediblər. Lakin hazırkı istilik mövsümündə onlar istilik üzünə tamamilə həsrət qalıblar. Səbəb kimi isə ərazidə yerləşən 4 məktəb və 1 bağçanın külli miqdarda borcu göstərilir.
Məsələ ilə bağlı məktəb və bağça rəhbərliklərindən cavab əldə etmək mümkün olmayıb.
“Azəristiliktəchizat” ASC-nin mətbuat katibi Elvin Basqallı açıqlama verib: “Həmin bina və qazanxana qaçqın və məcburi köçkünlər üzrə dövlət komitəsinin sifarişi əsasında tikilib və həmin qazanxana bizim balansımızda deyil. Adını çəkdiyim həmin qurumun balansındadır”.
Qaçqın və Məcburi Köçkünlərin İşləri üzrə Dövlət Komitəsindən bildirildi ki, yaşayış kompleksində qurulan qazanxanaların istismara hazırlıq aktı “Azəristiliktəchizat” və digər qurumların nümayəndələri tərəfindən imzalanıb. Dövlət komitəsinin müraciətlərinə baxmayaraq, qazanxanalar müvafiq qaydada balansa götürülməyib. Aidiyyəti quruma qəsəbədə sayğacların quraşdırılması üçün edilən müraciətlər də nəticəsiz qalıb. Buna baxmayaraq, məsələ komitənin diqqətindədir. Həlli istiqamətində lazimi addımlar atılır.
[caption id="attachment_80518" align="alignnone" width="640"]
Foto ATV-nin rəsmi Youtube kanalı[/caption]
