Tanınmış müğənniyə qarşı dələduzluq etməkdə şübhəli bilinən baş həkim həbs edilib. Bu haqda bu gün, 10 fevral tarixində Qafqazinfo məlumat verir.
Sabunçu rayonu 21 saylı Birləşmiş Şəhər Xəstəxanasının baş həkiminin müğənni Dəniz Əsədovaya iş həll etmək vədi verərək 627 min manatlıq dələduzluq etdiyi bildirilir. Sabunçu Rayon Məhkəməsinin qərarı ilə Rauf İsfəndiyarov barəsində həbs-qətimkan tədbiri seçilib.
Müğənni İsfəndiyarovun yarım milyon manatdan artıq pulu 2017-2018-ci illərdə ondan aldığını deyib: “Mənim şəxsi məsələm var idi, Rauf İsfəndiyarov həmin işi həll etmək adı ilə məndən 627 min manat pul almışdı. Lakin verdiyi vədə əməl etmədi, pulları da öz şəxsi ehtiyaclarına xərcləyib. Bu ilin yanvarında polisə şikayət edəndən sonra araşdırma müddətində vurduğu zərərin 100 min manatını polisdə mənə qaytardı. Lakin yerdə qalan 527 min manatı ödəməkdən imtina etdi. Rauf İsfəndiyarov qalan pulun üçdə birini verərək barışıq əldə etmək və şikayətimi geri götürməyimi istəyirdi, lakin bununla razılaşmadım və onun barəsində cinayət işi açıldı”.
Dəniz Əsədova, həmçinin Kəlbəcər Rayon Mərkəzi Xəstəxanasının keçmiş baş həkimi Mehparə Kazımova və daha bir neçə nəfər barəsində də dələduzluq iddiası ilə hüquq-mühafizə orqanlarına müraciət edib.
