Bakıda cari ilin mart və may aylarında Sabunçu rayonu ərazisindəki məktəblərdən birinin qarşısında şagirdlərə əxlaqsız təkliflər edən taksi sürücüsünə hökm oxunub. Bu haqda bu gün, 23 oktyabr tarixində Bakuplus.az Qafqazinfo-ya istinadən məlumat verir.
46 yaşlı Bəxtiyar Quliyev (ad-soyad şərtidir) barəsində Cinayət Məcəlləsinin “Əxlaqsız hərəkətlər” maddəsi ilə iş açılıb. Ona Sabunçu Rayon Məhkəməsinin hökmü ilə ona 3 il 3 ay müddətinə həbs cəzası verilib.
İstintaq zamanı məlum olub ki, icarəyə götürdüyü “Toyota Prius” markalı avtomobillə taksi fəaliyyəti göstərən şəxs martın əvvəllərində məktəbin qarşısına gəlib. O, 13 yaşlı şagirdi pəncərədən çağırıb, ona qeyri-etik təkliflər edib. Həmin qız qorxaraq hadisə yerindən qaçıb.
Daha sonra, may ayında o, həmin məktəbin önünə gəlib və yenə maşından enmədən 15 yaşlı qıza əxlaqsız təkliflər edib. Bu dəfə qız qışqıraraq haray salıb və hadisə barədə yaxınlarına məlumat verib. Bu səbəbdən axtarış tədbirləri həyata keçirilib, Quliyev saxlanılaraq istintaqa cəlb olunub.
