Paytaxtın Xəzər rayonu, Mərdəkan qəsəbəsində yerləşən 26 saylı dövlət xəstəxanasında xəstələrin daşınması üçün arabaların olmadığı iddia edilir. Bu haqda bu gün, 27 iyul tarixində Bakuplus.az BizimMedia-ya istinadən məlumat verir.
“Yaşlı qadını xəstəxanaya aparmaq üçün bir araba tapılmır. Bu da dövlət xəstəxanası”, - xəstə qadını tibbi müəssisəyə gətirən sosial şəbəkə istifadəçisi deyib.
TƏBİB-dən məsələ ilə bağlı bildirilib ki, Xəzər Tibb Mərkəzinin Təcili tibbi yardım şöbəsində iki əlil arabası mövcuddur.
“Zərurət yarandıqda hər bir pasiyent üçün arabalar ayrılır, porter vəzifəsində çalışan işçi planlı şəkildə xəstənin daşınmasını həyata keçirir. Əgər həmin anda arabalar başqa xəstələrin daşınmasına cəlb olunursa, xəstəyə bir qədər gözləmək təklif olunur”, - deyə qurumdan bildirilib.
