Bakının mərkəzində, Azərbaycan prospektində bir neçə ildir ki, səkinin üzərində yerləşdirilən köşkün fəaliyyəti dayandırılıb. Bu haqda bu gün, 30 noyabr tarixində Bakuplus.az məlumat verir.
Belə ki, illər öncə orada quraşdırılan köşk bu günlərdə sosial şəbəkələrdə gündəmə gəlib. “Bakı Gündəliyi” Facebook səhifəsinin könüllüləri şəkilləri paylaşaraq bildiriblər ki, ərazidə olan satış nöqtəsi səkinin böyük hissəsini zəbt edərək piyadalara maneçelik törədir.
Ötən gün köşkün fəaliyyəti dayandırılıb, aiddiyyəti qurumdan isə bildirilib ki, yaxın günlərdə köşk ərazidən götürüləcək. Lakin ərazidə olan avtobus dayanacağı da piyadaların hərəkəti üçün çox ciddi maneədir. Şəhərsalma norma və qaydalarına əsasən, səkilərin üzərində piyadaların hərəkətinə əngəl yaradan heç bir tikili olmamalıdır. Səkilərdə sadəcə yol nişanları və işıq dirəkləri quraşdırıla bilər, yəni dayanacaq pavilyonu da elə quraşdırılmalıdır ki, vətəndaşlar sərbəst hərəkət edə bilsinlər.
Təqdim olunan şəkillərdə aydın görünür ki, quraşdırılan dayanacaqla Nizami parkını əhatə edən divara qədər xeyli yer var. Oradan keçən piyadalara narahatlıq törədilir, araba və yaxud uşaqla keçən vətəndaşlar bu hissədən istifadə edə bilmir və məcburən avtomobil yoluna çıxırlar. Bir sözlə, köşkün bağlanması problemi tam həll edə bilməz. Səkidə piyadaların normal hərəkətini təmin etmək üçün dayanacaq da geriyə çəkilməlidir.
[caption id="attachment_121579" align="alignnone" width="640"]
Foto Baki Gundeliyi[/caption]
