Bakının Sabunçu rayonu, Maştağa qəsəbəsi, Tofiq Kazımov küçəsində boş ərazi zibilxanaya çevrilib. Bu haqda bu gün, 2 fevral tarixində Bakuplus.az ARB Media-ya istinadən xəbər verir.
Yük maşınları sözügedən əraziyə gəlir, oraya çirkab suları və məişət tullantılarını boşaldır. Bu da antisanitariyaya və üfunətə səbəb olur. Sakinlərin sözlərinə görə, xüsusilə yay aylarında üfunətə dözmək olmur. Onlar müvafiq qurumlara dəfələrələ müraciət etsələr də, problem öz həllini tapmayıb.
“Çölə uşaq buraxa bilmirik. Külək olan kimi nə zir-zibil var, hamısı həyətə uçub gəlir. Evimizdə, həyətimizdə otura bilmirik”, – deyə sakinlər şikayət edirlər.
Bundan əlavə, əraziyə zibil gətirən avtomobillər yoldan keçən içməli su xəttini də zədələyib.
Maştağa qəsəbə inzibati ərazi dairəsi üzrə nümayəndəsinin müavini Ramin Ağazadə bildirib ki, həmin maşınları görəndə barələrində dərhal tədbir görülür.
“Dəfələrlə onlara xəbərdarlıq olunub. Biz də, polislər də bacardığımızı edirik. Ancaq cəriməni ödəyirlər, bir müddət sakitlik olur, sonra gecə saat 2-5 radələrində yenə gəlib ora çirkab suları axıdırlar”, – deyə R.Ağazadə vurğulayıb.
Maştağa bələdiyyəsinin sədr müavini Ağanəcəf Qədirov deyib ki, məsələ ilə bağlı onlara müraciət edən olmayıb.
“Ötən il müraciət olunmuşdu, “sanepidemstansiya” ilə bir yerdə ora baxış keçirilib tədbir görülmüşdü. İndi isə bizə deyən olmayıb”, – deyə Qədirov bildirib.
O, yenidən baxış keçiriləcəyini vurğulayıb.
