Bakının Sabunçu rayonunun Maştağa qəsəbəsində sakinlər içməli suya möhtac qalıblar. Bu haqda bu gün, 1 may tarixində Bakuplus.az İctimai TV-yə istinadən xəbər verir.
Nizami küçəsində yaşayan vətəndaşlar uzun illərdir suyun verilməsi ilə problem yaşayırlar. Onların sözlərinə görə, bütün digər kommunal xidmətlərlə təmin olunsalar da, içməli suya indiyə kimi həsrətdirlər.
“3 il bundan qabaq kəndin bütün yerlərinə su çəkiblər. Bu 3 məhəllə qalıb, biz əziyyət çəkirik. Ayda 30-40 manat su maşınlarına veririk”, - deyə sakinlər şikəyət edirlər.
Sözügedən küçədə şəhid Tahir Əliyevin adına tikilən bulaq sakinlərin ehtiyacını qismən qarşılasa da, kifayət etmir. Bağlarda əkdikləri ağacların barını görə bilmirlər.
Məsələ ilə bağlı “Azərsu” ASC-dən bildirilib ki, həmin ərazinin bir hissəsində mərkəzləşmiş içməli su təchizatı sistemləri yaradılıb, qalan hissədə də baş plana əsasən, mərhələli şəkildə həll olunacaq.
