Bakının Sabunçu rayonu, Maştağa qəsəbəsində hamının diqqətini çəkən sarayın sahibi və müəllifi Eldar Qasımov haqqında reportaj çəkilib. Bu haqda bu gün, 20 oktyabr tarixində Bakuplus.az məlumat verir.
Baku TV-də yayımlanan “Arzunun vaxtı” verilişinin qəhramanı Eldar müəllim 50 ilə yaxın müddətdə Şuşa qalasına oxşar evini tikib. O, ölkənin müxtəlif yerlərindən daş daşıyıb.
“Mənə “Daş adam” deyirlər. Hansı rayona getmişəmsə, oradan daş gətirmişəm. Heç birinə pul verməmişəm”, - Qasımov deyir.
O, bu evini öz nəvə və nəticələri üçün tikdiyini deyib.
Qasımov bildirib ki, Şuşa qalasına bənzər evdə Azərbaycan və Türkiyə bayraqlarının dalğalanması, hətta 44 günlük Vətən müharibəsi zamanı erməniləri çaşdırıb. “Şuşa şəhəri azad edilən gün ermənilər mənim evimin görüntülərini paylaşıblar”, - deyə kişi əlavə edib.
Evdə bu günə kimi tikinti və abadlıq işləri davam edir. Gülçülük biznesi ilə məşğul olan sahibkar öz həyətini də cənnət bağına bənzədib.
