Sabunçu rayonu, Maştağa qəsəbəsində dağılmış yollar şikayətlərə səbəb olur. Bu haqda bu gün, 14 dekabr tarixində Bakuplus.az Real TV-yə istinadən xəbər verir.
Söhbət qəsəbənin Mehdi Hüseynzadə küçəsi, 8-ci döngədən gedir. Belə ki, burada yollar bərbad vəziyyətdədir. Yollarda asfalt dağıldığından yayda toz, qışda isə palçıq sakinlərin evlərinə ayaq açır. Bu səbəbdən də sakinlər hərəkət etməkdə ciddi çətinlik çəkirlər.
“Vay o günə ki, evdə kimsə xəstələnsin. Heç kim bu küçəyə gəlmir. Şəxsi avtomobillər isə yola tab gətirmir”, – deyə sakinlər şikayət edirlər.
Bundan əlavə, küçədə nə içməli su, nə də kanalizasiya xətti var. Yayda susuzluqdan əziyyət çəkən sakinlər həm də şamboları boşaltmaq üçün xeyli pul xərcləməyə məcbur olurlar.
“Biz nə qədər quyu suyundan istifadə edəcəyik?! Yayda o da quruyur”, – deyə sakinlər əlavə ediblər.
Sabunçu RİH-dən məsələ ilə bağlı bildirilib ki, müvafiq qurumlara artıq müraciət olunub və təmirsiz yollar yenidən qurulacaq. “Azərsu”dan isə bildirilib ki, sözügedən ərazidə gələcəkdə mərkəzləşdirilmiş infrastrukturun yaradılması planlaşdırılır.
