Qaradağ rayonunun Ümid qəsəbəsində sakinlər şəhərə getmək üçün çətinlik çəkirlər. Bu haqda bu gün, 13 yanvar tarixində Bakuplus.az ARB Xəbər-ə istinadən xəbər verir.
Qəsəbənin 4000 nəfərlik əhalisi şəhərə getmək üçün əlavə 13 kilometr yol qət etməyə məcbur olur.
Belə ki, Bakı-Qazax magistralında qəsəbə yaxınlığında olan geri dönüş hissələri ləğv edilib. Bu səbəbdən sakinlər Bakı istiqamətində yola çıxmaq üçün 6,5 kilometr yol getməli olurlar.
“Həm marşrut, həm də sürücülər üçün uzaqdır. Əvvəl 5 manata gedirdisə taksi, indi 10 manata gedir. Özümüz də 3 manatlıq benzin işlədirdiksə şəhərə gedəndə, indi sərfiyyat 2 qat artıb”, – deyə sakinlər şikayət edirlər.
Alternativ yol var, amma bərbad vəziyyətdədir. Sakinlər bildirirlər ki, kələ-kötür yolu təmir etmək, magistraldakı geri dönüş hissələrini bərpa etməkdən daha yaxşı olardı.
Qaradağ RİH başçısının Ümid qəsəbəsi üzrə nümayəndəliyindən deyildi ki, daxili yol təmir olunmasa da, Bakı-Qazax magistralında ləğv edilən ən yaxın geriyə dönüş hissəsi qaydalara uyğun şəkildə bərpa olunacaq. Yaxın zamanda tədbirlər görüləcək.
