Bakıda saxtalaşmada təqsirləndirilən Hindistan vətəndaşı “ASAN Viza” sisteminə müdaxilə edərək 27 min manat mənimsəyib. Bu haqda bu gün, 30 may tarixində Qafqazinfo məlumat verib.
Nərimanov Rayon Məhkəməsi işi araşdırdıqdan sonra Vişal Dansinqhaninə hökm oxuyub. Hökmə əsasən, təqsirləndirilən şəxs 9 ay müddətinə azadlıqdan məhrum edilib. O, məhkəmə zalında həbs edilib. Bundan əlavə, ona 2 il internetdən istifadə etmək qadağası qoyulub. Ondan 27.208 manat tutularaq Vətəndaşlara Xidmət və Sosial İnnovasiyalar üzrə Dövlət Agentliyinə ödənilməsinə qərar verilib.
47 yaşlı Vişal Dansinqhanin onlayn sistemə 1000-dən çox Hindistan və Pakistan vətəndaşı haqqında saxta məlumat daxil edib.
Araşdırma zamanı onun digər şəxslər haqqında məlumatlardan autentik (həqiqi) kompüter məlumatları kimi istifadə etmək məqsədilə “ASAN Viza” sisteminin informasiya ehtiyatında olan kompüter məlumatlarını dəyişdirdiyi məlum olub. O, “evisa.gov.az” internet ünvanına daxil olaraq və “Redaktə et” funksiyasından istifadə etməklə Azərbaycana viza almaq məqsədilə gələn əcnəbilər tərəfindən verilən məlumatları digər şəxslər haqqında məlumatlarla əvəz etmişdir. O, əcnəbilərlə saxtakarlıq təşkil etməklə sistemdəki ilkin məlumatların etibarlılığının pozulmasına səbəb olub.
Vişal Dansinqhanin 2022-ci ilin mart ayında Pakistandan olan Anjum adlı əcnəbi qadınla axşam yeməyi üçün “Salam Namaste” restoranına gəlib. O, özünü iş adamı kimi təqdim edərək, istənilən xarici ölkə vətəndaşlarına dövlət rüsumundan ucuz “ASAN Viza” verə bilər. Sözügedən üsulla o, 1000-dən çox turistə saxta viza verib.
