Nərimanov rayonunda köhnə lift sakinlər üçün çətinlik yaradır. Bu haqda bu gün, 21 iyun tarixində Bakuplus.az ATV-yə istinadən xəbər verir.
Rayonun Ceyhun Hacıbəyli küçəsində yerləşən çoxmərtəbəli binanın liftləri bərbad vəziyyətdədir. Belə ki, lift qəzalı olduğundan tez-tez xarab olur. İşlək olanda isə ondan istifadə etmək qorxuludur.
Sakinlərin sözlərinə görə, 2 liftdən biri uzun müddətdir ki, heç çalışmır, digəri isə təhlükəli vəziyyətdədir. Bir neçə gün öncə lift 9-cu mərtəbədən yerə düşüb. Onlar MTK tərəfindən təmir üçün pul tələb olunduğunu bildirirlər.
“Əvvəl 500 manat istəyidilər, sonra 1000 manat. Heç kim o pulu vermir. MTK özü lifti təmir etməlidir”, - deyə sakinlər bildirirlər.
“Şərur” MTK-nın sədri bildirib ki, liftlərin dəyişdirilməsi üçün birbaşa sakinlərdən pul yığılmalıdır.
“Təmir üçün milyon yarım pul tələb olunur. Bunu nə dövlət, nə də MTK verməlidir. Hamısı sakinlərin boynuna düşür”, - deyə o, əlavə edib.
Ekspertlər isə vurğulayırlar ki, liftləri birmənalı olaraq MTK təmir etməlidir. Çünki şirkət sakinlərdən aylıq ödəniş alır. Bu da binada baş verən bütün problemlərin həll olunması üçündür.
