Paytaxtın Nərimanov rayonu, Sabit Rəhman küçəsində yerləşən binanın sakinləri avtomobillərini saxlamağa yer tapa bilmirlər. Bu haqda bu gün, 20 aprel tarixində Bakuplus.az Xəzər Xəbər-ə istinadən məlumat verir.
Cərimələrə səbəb yaşayış obyektinin yeraltı qarajında avtomobil saxlamaq üçün yerlərin kifayət qədər olmamasıdır. Buna görə də sakinlər avtomobillərini binanın qarşısında, yol kənarında saxlamağa məcbur olurlar. Bu hərəkətləri ilə müvafiq yol nişanının tələblərini pozduqlarına görə sürücülər kütləvi şəkildə cərimələnirlər.
Vətəndaşlar bu vəziyyətdən çıxış yolu tapa bilmədiklərindən şikayətlənirlər. Onların sözlərinə görə, “Dayanmaq qadağandır” nişanı binanın tikintisi zamanı təhlükəsizlik məqsədilə quraşdırılıb, işlər başa çatdıqdan sonra isə sökülüb. Lakin sonradan nişan öz yerinə qaytarılıb və indi sakinlər nəqliyyat vasitələrini harada saxlayacaqlarını bilmirlər.
Məsələ ilə bağlı Bakı Nəqliyyat Agentliyindən (BNA) bildirilib ki, göstərilən küçədə həm parkinq, həm də nəqliyyat şəraiti ilə bağlı problemlər var. Agentliyin mütəxəssisləri vəziyyəti təhlil ediblər, əldə olunan nəticələr əsasında layihə hazırlanır.
Müvafiq strukturlarla razılaşdırıldıqdan sonra layihənin icrasına başlanılacaq.
[URIS id=97862]
