Paytaxtın Nərimanov rayonu ərazisində qeyri-qanuni tikili sakinlərin həyatını təhlükəyə atır. Bu haqda bu gün, 27 aprel tarixində Bakuplus.az ARB Xəbər-ə istinadən məlumat verir.
Həsən Əliyev, 33 ünvanında binanın qarajlarının birində təhlükəli vəziyyət yaşanıb. Qarajda olan sütunlara müdaxilə edilib və onlar nazikləşdirilib. Sütunlar artıq üzərindəki ağırlığa tab gətirə bilmir və uçmaq təhlükəsi yaşanır.
Həmçinin sakinlərin yaşadıqları binanın sağ tərəfində heç bir məsafə saxlanılmadan qanunsuz şəkildə 11 mərtəbəli yeni bina ucaldılır. Sakinlər deyirlər ki, 2015-ci ildən binanın yaxınlığında yeni göydələn ucaldılıb. Növbəti binanın tikintisinə isə 2019-cu ilin sonunda başlanılıb. Yeni tikili 2 binanın arasında, hətta onlara bitişik tikilməli idi. Bu isə təhlükəli vəziyyət yaradırdı. Bu səbəbdən aidiyyəti qurumlar işləri dayandırıb və binanın bünövrəsi sökülüb. Amma bir müddət sonra şirkət tikintiyə yenidən başlayıb.
Tikinti şirkətinin nə ərazidəki nəzarətçisindən, nə də telefonla əlaqə saxlayaraq münasibət öyrənmək mümkün olmayıb.
Dövlət Şəhərsalma və Arxitektura Komitəsindən bildirildi ki, 2 bloklu 18 mərtəbəli nəzərdə tutulan yaşayış binasının 2-ci girişinin tikintisinə icazə 2020-ci ilin sentyabr ayında komitə tərəfindən ləğv edilib. FHN-in Tikintidə Təhlükəsizliyə Nəzarət Dövlət Agentliyi vəziyyətlə bağlı qərarı yerli icra hakimiyyəti və polis idarəsinə göndərib.
Nərimanov Rayon İcra Hakimiyyətindən bildirilib ki, tikinti işləri dayandırılıb. Ərazi nəzarətdə saxlanılır.
Yaşayış olan birinci blokun zirzəmisindəki sütunlara müdaxiləyə gəlincə FHN-dən bildirildi ki, yaxın zamanda əraziyə baxış keçiriləcək və hər hansı qanunsuzluq aşkarlanarsa, lazımi tədbirlər görüləcək.
[caption id="attachment_98578" align="alignnone" width="640"]
Foto ARB24-ün rəsmi Youtube kanalı[/caption]
