Nərimanov rayonu, Xətai prospekti, 41 ünvanında yerləşən və paylı mülkiyyətdə olan mənzilin qanunsuz sökülməsində təqsirləndirilən “MƏQAM” MTK-nın vəzifəli şəxsinin cinayət işi məhkəməyə göndərilib. Bu haqda bu gün, 14 noyabr tarixində Bakuplus.az Report-a istinadən məlumat verir.
İstintaq zamanı məlum olub ki, Cəmil Qasımov sözügedən MTK-nın icraçı direktoru vəzifəsində işləyərkən söküntü işlərinin aparılmasına dair müqavilə bağlanmış şəxsə guya həmin mənzildə payları olan şəxslərin razılığının alınması barədə yalan məlumat verərək ümumi sahəsi 111,2 kv.m olan yaşayış sahəsinin 38,07 kv.m hissəsinin qanunsuz sökülməsinə nail olub və nəticədə vətəndaşa 71.000 manatdan artıq məbləğdə maddi ziyan vurub.
Toplanmış materiallar baxılması üçün Nərimanov rayon məhkəməsinə göndərilib.
Daha öncə Nərimanov rayonu, Qarabağ küçəsi, 42 ünvanında yaşayan sakinlər MTK-nı 60 ailənin yaşadığı binanın qəsdən dağıdılmasında ittiham ediblər.
