Bakının Nəsimi rayonu, Moskva prospekti ərazisində ağaclar təhlükə yaradırlar. Bu haqda bu gün, 10 iyul tarixində Bakuplus.az İctimai TV-yə istinadən xəbər verir.
Metronun “20 Yanvar” stansiyası yaxınlığında, yol kənarında quruyan şam ağacları hər an aşa bilər. Bu da sakinlərin narahatlığına səbəb olub.
Vətəndaşların sözlərinə görə, adıçəkilən ərazidən keçmək təhlükəlidir və həmin ağaclar ya budanmalı, ya da kəsilməlidir.
Bakı şəhər Yaşıllaşdırma Təsərrüfatı Birliyindən bildirildi ki, qurumuş ağaclar Ekologiya və Təbii Sərvətlər Nazirliyinin müvafiq rəyi əsasında kəsilməli və ya budanmalıdır. Bu proses isə yalnız nazirlikdən rəy alındıqdan sonra həyata keçiriləcək.
Dövlət Ekoloji Ekspertiza Agentliyinin mətbuat katibi Elnur Ağayevin sözlərinə görə, quruma müraciət daxil olmayıb.
“Müraciət daxil olduğu təqdirdə regional struktur bölmələrimizin əməkdaşları tərəfindən yaşıllıqların vəziyyətinə baxış keçiriləcək və rəy verilməsi məsələsinə baxılacaq”, – deyə E.Ağayev bildirib.
Mətbuat katibi əlavə edib ki, müsbət rəy veriləcəyi təqdirdə torpaq mülkiyyətçisi olan bələdiyyə və yaxud İcra Hakimiyyəti orqanları qərar verərək, yaşıllığın götürülməsi vərəqi əsasında ağacların köçürülməsi və yaxud budanması təmin edilir.
