Bakının Nəsimi rayonu, Ceyhun Səlimov küçəsi, 7 saylı binanın həyətyanı sahəsində təmir işlərinə başlanılıb. Bu haqda bu gün, 17 may tarixində Bakuplus.az Rayon İcra Hakimiyyətinə (RİH) istinadən xəbər verir.
Hazırlanmış “Bizim həyət” layihəsi çərçivəsində yaşayış binasının fasadında və dam örtüyündə əsaslı təmir işləri aparılıb, yağış suları axıdan boru və navalçalar dəyişdirilib. Həmçinin binanın qapı və pəncərələri yeniləri ilə əvəz olunub, giriş bloklarında əsaslı təmir işləri aparılıb.
Əlavə olaraq, həyətdə hasara alınmış sahələr sökülərək sakinlərin ümumi istifadəsinə verilib, təhlükəli vəziyyətdə olan qurumuş ağaclar budanaraq ərazidən çıxarılıb.
Hazırda həyətyanı sahədə abadlıq quruculuq işləri davam etdirilir. Həyətdə tamet bordür daşlarının vurulması, istinad divarlarının bərpası və yaşıllaşdırma işlərinə başlanılıb.
Eyni zamanda söhbətgah, oturacaqlar, müxtəlif növ uşaq oyun elementlərinin və idman qurğularının quraşdırılması, suvarma, işıqlandırma sistemlərinin çəkilməsi və təhlükəsizlik kameralarının quraşdırılması işləri də nəzərdə tutulub.
