Bakının Nəsimi rayonu, Səməd Vurğun, 116 ünvanında istilik sistemi vaxtından tez söndürülüb. Bu haqda bu gün, 27 mart tarixində Bakuplus.az Baku TV-yə istinadən xəbər verir.
Sakinlərin sözlərinə görə, adətən, istilik sistemi aprelin 15-dən kəsilir. Lakin bu dəfə əməkdaşlar martın 18-dən bütün binanın istiliyini kəsiblər.
“Qurumdan bizə deyiblər ki, binanın borcu var. Heç kim bilmir ki, nə qədər borcu var, qəbz gəlməyib”, – deyə sakinlər şikayət edirlər.
“Azəristiliktəchizat”ın mətbuat katibi Elvin Basqallıdan verilən məlumata görə, vətəndaşlar istifadə etdikləri enerjiyə görə borclarını ödəmirlər, bu səbəbdən də istilik kəsilib. Xəbərdarlıq kimi binanın girişində elan da yerləşdirilib.
“Binada 104 mənzil var. Onlardan 46-sı mərkəzləşdirilmiş qaydada istiliklə təmin edilir. 42-si isə istiliyə görə pul ödəmir. Cəmi 4 mənzil ödəniş edir. Bu səbəbdən binanın istilik təchizatı dayandırılıb”, – deyə E.Basqallı qeyd edib.
O əlavə edib ki, istilik binaya ümumi verildiyindən ödəniş edənlər də istiliksiz qalıblar.
