Paytaxtın Sabunçu rayonu, Elşən Mehdiyev küçəsində yaşayan sakinlərin həyatı təhlükə altındadır. Bu haqda bu gün, 8 dekabr tarixində Bakuplus.az APA TV-yə istinadən xəbər verir.
Riskli ərazi sayılan bu ərazi SOCAR-ın balansındadır. Çünki buradan neft boruları keçir və yüksək gərginlikli elektrik xətləri hər gün şagirdlərin qorxusuna səbəb olur.
“Külək əsən kimi elektrik naqilləri silkələnir, biz də yolla gedəndə başımıza düşər deyə qorxuruq”, - deyə şagirdlər bildirirlər.
Tezalışan mayelərin keçdiyi böyük diametrli borularda xırda sızma baş versə, güclü partlayış ola bilər. Buna baxmayaraq, üstündən keçmək üçün kustar yolla körpülər də tikilib, uşaqlar üçün konteynerlərdən məktəb yaradılıb.
Qanuna əsasən, neft kəmərlərinin mərkəzi oxundan hər tərəfə 50 metr olmaqla mühafizə zonası yaradılır və burada kənar şəxslərin yaşaması qadağan olunur, ancaq burada bu qanuna riayət olunmur.
“Təsəvvür edin, neft kəməri vətəndaşların həyətindən keçir. Hər hansı sızıntı olarsa, biz ev sahibindən icazə almalıyıq. Daha sonra neft kəmərinə müdaxilə edə bilərik”, - deyə SOCAR-ın təhlükəsizlik idarəsi rəisinin müşaviri Səbuhi Şəldiyev vurğulayıb.
Ümumiyyətlə, Bakı və ətraf ərazilərdə sənədsiz həyət evlərinin sayı 500.000-dən çoxdur. Onların 70.000-ə yaxını riskli ərazilərdə yerləşir.
[caption id="attachment_82304" align="alignnone" width="640"]
Foto apa.az saytı[/caption]
