Bakının bir sıra ərazilərində dayanacaq nişanları quraşdırılsa da, sərnişinlər üçün nəzərdə tutulan pavilyonlar hələ də mövcud deyil. Sərnişinlər havalar isindikcə belə dayanacaqlarda avtobus gözləməyin çətin olduğunu deyirlər. Bu haqda bu gün, 22 iyun tarixində Bakuplus.az Xəzər Xəbər-ə istinadən məlumat verir.
Pavilyon olmayan yerlərdə vətəndaşlar məcbur qalıb ağacların altında kölgə axtarırlar. Bu da yaşlı insanlar üçün çətinlik yaradır: onlar tez gələn-gedən avtobuslara minə bilmədiklərinə görə növbəti avtobusu gözləməyə məcbur qalırlar.
Yerüstü Nəqliyyat Agentliyinin rəsmisi Tural Orucovun sözlərinə görə, avtobus dayanacağı pavilyonları quraşdırılan zaman yol infrastrukturunun vəziyyəti mütləq qaydada nəzərə alınır. Bakının bir çox hissəsində avtobus dayanacağı məntəqələrinin yerləri müəyyən edilib. Bu istiqamətə mütəmadi olaraq təhlilər aparılır. Mövcud səki infrastrukturu və əhalinin gəliş-gedişi nəzərə alınaraq, ya dayanacaq pavilyonları quraşdırılır, ya da dayanacaq nişanları qoyulur.
Bir sözlə, sakinlər gələcəkdə istidən əriyərək, soyuqdan donaraq pavilyonları olmayan dayanacaqlarla dolanmağa məcbur olacaqlar.
