Bakının Nizami rayonu, Babək prospekti, 79 ünvanında yerləşən yataqxana qəzalı vəziyyətdədir. Bu haqda bu gün, 30 mart tarixində Bakuplus.az ATV News-a istinadən xəbər verir.
Sözügedən binada 114 ailə yaşayır. Tikilinin divarlarında iri çatlar əmələ gəlib, pilləkənlər qəzalı vəziyyətdədir, eləcə də binanın tavan hissəsində çökmələr var. Əlavə olaraq, zirzəmiyə kanalizasiya suları dolur, üfunətdən mənzillərdə oturmaq mümkün olmur.
“Zirzəmi ağzına kimi su ilə dolub. Biz isə 1-ci mərtəbədə yaşayırıq. Az qalır ki, ev çöksün. Piləkənlərlə düşə bilmirik, qorxuruq ki, yıxılıb əziləcəyik”, – deyə sakinlər şikayət edirlər.
Əraziyə cavabdeh olan 121 saylı Mənzil-Kommunal İstismar Sahəsinin mühəndisi Cümşüd Babayev bildirdi ki, aidiyyəti qurumlar yataqxanaya baxış keçirib. Binada əsaslı təmir işlərinin aparılmasına qərar verilib. Lakin sakinlər razılaşmırlar.
“Əlaqədar qurumlar burada yaşayan sakinlərlə söhbət aparıb. Sakinlər dedilər ki, onlara təmir lazım deyil, buradan köçürülmələri daha məqsədəuyğundur”, – deyə C.Babayev qeyd edib.
“Azərsu” ASC-dən bildirilib ki, 20 gün əvvəl yataqxananın zirzəmisindən sular çəkilib, cari təmir işləri görülüb. Sakinlər tullantıları kanalizasiyaya atdıqlarına görə tutulmalar olur və su zirzəmiyə axır. Problemin aradan qaldırılması üçün əraziyə yenidən briqada cəlb olunacaq.
