Paytaxtın Nizami rayonu, Qara Qarayev prospekti, 114, ünvanında, “8-ci kilometr qəsəbəsi” adlanan ərazidə sakinlər baxımsız liftdən şikayət edirlər. Bu haqda bu gün, 16 mart tarixində Bakuplus.az Real TV-yə istinadən xəbər verir.
Sakinlərin sözlərinə görə, 20 il əvvəl quraşdırılan lift bu günə qədər dəyişdirilməyib. Onlar öz həyatlarından narahatdırlar.
“Deyirik ki, dəyişsinlər, cavab verirlər ki, vaxtına hələ var. İçinə qorxa-qorxa girirsən. Tros hər an qırıla bilər”, - deyə sakinlər şikayət edirlər.
Bu vəziyyətin yaranmasının əsas səbəblərindən biri də blokun qapısının olmamasıdır. Qapı qırıldığından bloka narkotik aludəçiləri girirlər, hətta bəzi evlərdə oğurluq belə olmuşdur.
10 saylı mənzil kommunal istismar sahəsi məsələ ilə bağlı bildirdi ki, problemdən xəbərdardırlar və artıq müvafiq orqanlara müraciət olunub. Yaxın zamanda sakinləri narahat edən məsələlər öz həllini tapacaq.
