Bakının Nizami rayonu, Rüstəm Rüstəmov, 66 ünvanında yaşayan sakinlər iddia edirlər ki, ərazidə olan ağaclar düzgün budanmayıb. Bu haqda bu gün, 25 oktyabr tarixində Bakuplus.az ATV-yə istinadən xəbər verir.
Sakinlərin sözlərinə görə, özünü mütəxəssis adlandıran şəxslər gələrək 60-70 yaşlı ağacları doğrayıb gediblər, amma quru budaqlara əl vurmayıblar. Sakinlər deyirlər ki, ağacları cavanlaşdırmaq, sağaltmaq əvəzinə, yaşıllıqları məhv ediblər.
Ağacların budanması ilə məşğul olan şəxslər bildirirlər ki, sakinlərin müraciəti əsasında buraya gəliblər.
Bakı şəhər Yaşıllaşdırma Təsərrüfatı Birliyinin baş mühəndisi Cavanşir Məmmədov bildirib ki, vətəndaşların müraciətinə əsasən, budaqların söhbətgahın üzərinə düşməsi təhlükəsi olduğuna görə, onlar budaqları kəsib.
Ərazidəki kəsilməsi zəruri olan ağacların kəsilməsinə gəlincə, Cavanşir Məmmədov dedi ki, bunun üçün Ekologiya və Təbii Sərvətlər Nazirliyinin (ETSN) rəyi olmalıdır. Lakin ağacların budanması üçün nazirliyinin rəy verməsinə ehtiyac yoxdur.
