Paytaxtın Nizami rayonu, Rüstəm Rüstəmov küçəsində ağacların qanunsuz kəsilməsi faktı aşkarlanıb.
“Ağacların kim tərəfindən kəsildiyinin müəyyən olunması və barələrində qanunamüvafiq tədbirlər görülməsi məqsədilə toplanmış sənədlər hüquq-mühafizə orqanlarına göndərilməsi üçün hazırlanır”, – açıqlamada deyilir.
13:22 - Nizami rayonunda “Premium Park” yaşayış kompleksinin qarşısında 30 zeytun ağacı kəsilib
Paytaxtın Nizami rayonu, Rüstəm Rüstəmov küçəsində inşa olunan “Premium Park” yaşayış kompleksinin qarşısında bir neçə gün öncə 30-a yaxın zeytun ağacının kəsildiyi deyilir. Bu haqda bu gün, 8 dekabr tarixində Bakuplus.az “Bakı Gündəliyi” Facebook səhifəsinə istinadən məlumat verir.
Sosial şəbəkə istifadəçisinin sözlərinə görə, çoxillik ağacları MTK-nın qarşısında parkinq yaratmaq üçün kəsiblər.
“Kəsilən ağacların əvəzinə sanki kompensasiya olaraq kiçik yolkalar əkiblər. Amma zaman keçdikcə onları da qurudub yox edəcəklər”, – deyə videonun müəllifi əlavə edib.
“Premium Park” şirkəti iddiaların həqiqəti əks etdirmədiyini bildirib.
“Bir müddət öncə bəzi sosial şəbəkə səhifələrində ünvanımıza səsləndirilən böhtan xarakterli fikirlərə cavab olaraq bildirmək istərdik ki, sözügedən ərazinin yaşayış kompleksinə heç bir aidiyyəti olmaması ilə yanaşı, şirkətin əməkdaşları tərəfindən orada əkilən ağaclara mütəmadi olaraq aqrotexniki qulluq göstərilir. Həmçinin şirkətin hədəflərindən birinin ətraf mühitə töhfə vermək olduğunu nəzərə alaraq, yaşayış kompleksinin daxilində də gələcəkdə ağacların əkilməsi nəzərdə tutulub”, – deyə şirkət nümayəndəsi qeyd edib.
Məsələ ilə bağlı Ekologiya və Təbii Sərvətlər Nazirliyinə müvafiq müraciət göndərilib.
