Bakının Nizami rayonu, Şərq küçəsində piyada səkisinin yerində parkinq yaratmaq istəyiblər. Bu haqda bu gün, 25 oktyabr tarixində Bakuplus.az “Bakı Gündəliyi”nə istinadən xəbər verir.
Vətəndaşların sözlərinə görə, sözügedən ərazidə piyada səkisini sökərək yerində avtomobil dayanacağı yaratmaq istəyirlər. Bu da piyadaların hərəkətində ciddi problem yaradacaq.
Qafqazinfo-dan verilən məlumata görə, Nizami Rayon İcra Hakimiyyətindən məsələ ilə bağlı bildirilib ki, ərazidə yerləşən qeyri-yaşayış sahəsi xüsusi mülkiyyətdədir. Həmçinin qeyri-yaşayış sahəsinin Dövlət Şəhərsalma və Arxitektura Komitəsi Yanında Bakı Şəhər Memarlıq və Şəhərsalma Baş İdarəsinin müvafiq icazəverici sənədləri var.
Azərbaycan Respublikasının Dövlət Şəhərsalma və Arxitektura Komitəsindən öz növbəsində qeyd edilib ki, həmin ərazidə yoxlama keçirilib. Aşkar olunub ki, qeyri-yaşayış obyektinin qarşısında piyada səkisinin dağıdılaraq avtomobillər üçün parklanma yerinin yaradılması planlaşdırılırdı.
Aparılan işlər dayandırılıb və səkinin bərpa edilməsi üçün müvafiq xəbərdarlıq edilib.
