Nizami rayonu, Kamil Balakişiyev küçəsi, 45 ünvanında qurumuş ağacın kökləri kanalizasiya xətlərini zədələyir. Bu haqda bu gün, 29 fevral tarixində Bakuplus.az Real TV-yə istinadən xəbər verir.
Sözügedən ağacın kökü kanalizasiya xətlərini bağlayaraq suyun zirzəmiyə və ətrafa yayılmasına səbəb olur. Bu da kəskin üfunətə səbəb olur. Müvafiq qurumlar isə ağacın kəsilməsinə icazə vermir.
“Evdə çörək yeyə bilmirik. Elə bil kanazliasiyanın üzərində oturmuşuq. Pəncərəni aça bilmirik. 1 dənə ağaca görə bütöv bina əziyyət çəkir”, – deyə sakinlər şikayət edirlər.
Nizami Sukanal İdarəsindən məsələ ilə bağlı bildirilib ki, ağacın kəsilməsi ilə bağlı dəfələrlə müraciət etsələr də, müsbət cavab ala bilməyiblər.
“Kanalizasiya boruları da dəyişdirilməlidir. Dəfələrlə nümayəndələr gəliblər. Amma hələ də bizə razılıq vermirlər”, – deyə idarənin rəis müavini Qurban Quliyev bildirib.
Ekologiya Nazirliyindən isə vurğulanıb ki, problemdən xəbərdardırlar və ağacın yeri dəyişdiriləcək.
