Nizami rayonu, Bakıxanov qəsəbəsi, Cəmşid Naxçıvanski, 100 ünvanında yaşıllığın məhv edilərək tikinti aparıldığı bildirilir. Bu haqda bu gün, 6 mart tarixində Bakuplus.az ATV-yə istinadən xəbər verir.
Sosial şəbəkələrdə ağacların kəsilərək yerinə bina tikilməsi ilə bağlı görüntülər yayılıb. Ərazidə işləyən şəxslərdən əraziyə baxış keçirilməsi istənilsə də onlar heç kimi içəri buraxmırlar.
“Mənim ərazimdir, buraya giriş qəti qadağandır. Kimin nə sözü var, getsin qıraqda desin”, – deyə əməkdaşlardan biri qeyd edib.
Bundan əlavə, inşaat yaşayış binalarına yaxın məsafədə aparılır. Qanuna əsasən, hündürlüyü 3 metrdən yuxarı divar səthi 25 kv.m-dən artıq olan bütün tikililər üçün ara məsafəsi şərtləri mövcuddur.
Ekologiya Nazirliyindən məsələ ilə bağlı bildirilib ki, ərazi nəzarətə götürülüb. Araşdırma aparıldıqdan sonra lazımi addım atılacaq.
