Bakının Nizami rayonu, Şərifli küçəsində qurumuş ağaclardan biri mənzillərin üzərinə aşıb. Bu haqda bu gün, 18 yanvar tarixində Bakuplus.az ATV Show-ya istinadən xəbər verir.
“Gecə saat 4-də ağac qəfil qırılaraq damın üzərinə düşdü. Mən də evdə yatırdım. Tez uşağı da götürüb pəncərədən uzaqlaşdım ki, yenə şüşələri sındırar”, – deyə həmin anı sakinlərdən biri danışıb.
Sözügedən ərazidə bir neçə çürümüş ağac var və belə hadisənin ilk dəfə baş vermədiyi bildirilir. Bir müddət öncə başqa ağac da külək əsən zaman qırılaraq eyvanın üstünə aşmışdı. Sakinlər qorxu içində yaşadıqlarını, uşaqlar çöldə oynamaqdan qorxduqlarını deyirlər.
“İcraya da zəng etmişəm, Yaşıllaşdırma İdarəsinə də. Gəlib ağacın birini kəsiblər, digəri qalıb”, – deyə şikayətçi qeyd edib.
Nizami Bələdiyyəsinin sədr müavini Heydər Rəhimovun sözlərinə görə, qurumuş ağaclarla əlaqədar dekabr ayında Yaşıllaşdırma Təsərrüfatı Birliyinə müraciət olunub.
Sonuncu isə havaların soyuq keçməsi ilə əlaqədar işlərin dayandırıldığını vurğulayıb. Bir müddət sonra ağaclar budanıb.
