Bakının 28 May küçəsində irigövdəli ağac bir müddət ərzində qəsdən məhv olunur. Bu haqda bu gün, 2 iyul tarixində Bakuplus.az Bakı Gündəliyi Facebook səifəsinə istinadən məlumat verir.
Cari ilin fevral ayında sözügedən ağac amansızlıqla kəsilib, demək olar ki, ağacın gövdədən başqa heç bir budağı qalmayıb. Bir müddət sonra binanın qarşısında təmir-tikinti işləri üçün nərdivan quraşdırıldı. İctimai fəalların sözlərinə görə, ağacın bu cür kəsilməsi məhz tikintiyə görə olub.
Vandallıq əməllərinə baxmayaraq, iyun ayında çəkilən kadrlardan görünür ki, ağac məhv olunmayıb və yenicə pöhrələnib. Lakin bu gün lentə alınan şəkillərdən aydın görünür ki, əmələ gələn yarpaqlar yenidən kəsilib.
Bakı Şəhər İcra Hakimiyyətindən bildirilib ki, baş vermiş bu hadisə ilə bağlı Baki Şəhər Yaşıllaşdırma Təsərrüfatı Birliyinin mütəxəssisləri tərəfindən ağaca baxış keçirilib, müdaxilə faktı aşkarlanıb. Fakt aktlaşdırılaraq aidiyyəti üzrə hüquq-mühafizə orqanlarına göndərilib.
