Ötən həftə Türkiyəyə yardım olaraq yorğan-döşək və digər humanitar yardımları köhnə qırmızı avtomobilində aparan Sərvər Bəşirli sosial şəbəkələrdə ən çox danışılan personajlardan birinə çevrilib və bundan sonra televiziyaya dəvət olunub. Bu haqda bu gün, 13 fevral tarixində Bakuplus.az məlumat verib.
Tarix Əliyevin (Tolik) aparıcılığı ilə yayımlanan “Ümid ilə gəl” verilişində Bəşirliyə yeni avtomobil almasına köməklik məqsədilə kampaniyaya start verilib və tezliklə Rusiyada yaşayan azərbaycanlı iş adamının ona yeni avtomobil hədiyyə edəcəyi məlum olub. Avtomobilin açarları bu gün verilməli idi.
Lakin bu baş verməyib: Əliyev veriliş zamanı bildirib ki, avtomobil istəmədiklərini deyən Bəşirlinin valideynləri ilə görüşüb, övladının şəxsi mənzili olmadığı üçün maşın almağa ayrılan pulun ev tikmək üçün köçürməsini istəyib.
Tarix Əliyev Sərvər Bəşirliyə 10.000 manatı efirdə köçürüb və qeyd edib ki, ev tikildikdən sonra ona mebellə təminatda köməklik edəcək.
