Bakının Xətai və Qaradağ rayonlarında bəzi binalar qəzalı vəziyyətdədir. Bu haqda bu gün, 5 mart tarixində Bakuplus.az ATV-yə istinadən xəbər verir.
Xətai rayonunun NZS qəsəbəsində yerləşən qamış üzlüklü binaların təmirə ehtiyacı var. Tikililərin divarları çatlayıb, bloklardakı döşəmələr isə aralanıb.
“Binalar acınacaqlı vəziyyətdədir. Hər an uça və ya yanğın baş verə bilər. Biz burada qorxa-qorxa yaşayırıq. Bir sıra aidiyyəti qurumlara müraciət etmişik. Lakin heç bir nəticə əldə olunmayıb”, – deyə sakinlər bildirirlər.
Oxşar vəziyyət Qaradağ rayonunun Qızıldaş qəsəbəsində də müşahidə edilir. Bu ərazidə də qamış üzlüklü binalar təhlükəli haldadır.
“Yağış yağanda başımıza damır. Biraz güclü külək əsəndə bina silkələnir, hamı qorxudan küçəyə qaçır. Bu il təmir etdik evimizi. Az müddət sonra parça-parça olub tökülməyə başladı”, – deyə vətəndaşlar qeyd ediblər.
Məsələ ilə bağlı Qaradağ rayon Mənzil-kommunal təsərrüfatı birliyi açıqlama verib. Bildirilib ki, bununla bağlı aidiyyəti qurumlara rəsmi müraciət ünvanlanıb. Ola bilər ki, həmin binalarda söküntü işləri aparılsın.
Xətai rayon İcra Hakimiyyətindən isə rayon ərazisində “Ağ şəhər” layihəsinin həyata keçirildiyi qeyd olunub. Həmin binalar proyektə uyğun olaraq söküləcək.
