Paytaxtın Xəzər rayonu, Nardaran qəsəbəsi, Məhəmməd Mövsümzadə küçəsinin sakinləri şəraitsizlikdən şikayət edirlər. Bu haqda bu gün, 24 fevral tarixində Bakuplus.az Real TV-yə istinadən xəbər verir.
Sakinlər yolsuzluq, susuzluqdan narazıdırlar və zibilləri atmaq üçün konteynerlərin olmadığını bildirirlər.
Belə ki, burada yayda tozdan, qışda isə palçıqdan hərəkət etmək mümkün olmur. Sakinlər sadə işıqlandırma sisteminə belə möhtac qalıblar. İçməli su isə fasilələrlə verilir. Sakinlər bildirirlər ki, qışda içməli su verilsə də, yayda, demək olar ki, su olmur.
“Kəndin elə bir küçəsi yoxdur ki, yol asfaltlanmasın. Bircə bizim küçə qalıb. Qurumlar bu küçəni də təmir edəcəklərini desələr də, bizdən yan keçiblər”, - deyə sakinlər vurğulayırlar.
Bundan əlavə, ərazidə zibil konteynerlərinin olmaması sakinlərə çətinlik yaradır. Onlar zibili tərk edilmiş su anbarının ərazisinə atır, sonra isə onları orada yandırırlar.
Rəsmi qurumlar məsələ ilə bağlı bildiriblər ki, sözügedən küçənin təmir olunması nəzərdə tutulub və mərhələli şəkildə həyata keçiriləcək. Su ilə bağlı isə “Azərsu”dan qeyd ediblər ki, qəsəbədə nasos stansiyası tikilir. Stansiya işə düşən kimi sözügedən küçədə də daimi su olacaq.
