Sabunçu qəsəbəsində "Stansiyanın yanı, 32" adlanan ünvanda yerləşən bina yaşayış üçün yararsız hala düşüb. Bu haqda bu gün, 26 noyabr tarixində Qafqazinfo məlumat verib.
Binada 23 ailə yaşayır. Sakinlər həyatlarının təhlükə altında olduğunu bildirirlər: “Çoxumuz qorxudan yata bilmirik. Binanın 1 əsr yaşı var. Tavanı yararsız vəziyyətə gəlib, döşəməsi hər an sökülə bilər”.
Qurumlar dəfələrlə binaya baş çəkib qəzalı vəziyyətdə olduğu qənaətinə gəlsələr də, binanın sökülməsi və ərazidən köçürülmə ilə bağlı heç bir cavab verilməyib.
Sabunçu Rayon İcra Hakimiyyətindən açıqlama verilib: “Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin mütəxəssisləri tərəfindən qeyd olunan binaya vizual texniki baxış keçirilib, qəzalı vəziyyətdə olması haqqında 17.11.2015-ci il tarixli akt tərtib olunub. Qeyd olunan binanın texniki göstəriciləri barədə məlumatlar Bakı Şəhər İcra Hakimiyyətinə təqdim olunub”.
Bakı Şəhər İcra Hakimiyyəti məlumatı təsdiqləyərək bildirib ki, sənədlər aidiyyəti quruma göndərilib, qəbul olunan qərara əsasən, tədbirlər görüləcək.
[caption id="attachment_80702" align="alignnone" width="640"]
Foto açıq mənbədən[/caption]
