Bakının Xətai rayonu, Fəzail Bayramov küçəsində qanunsuz tikinti işləri aparılır. Bu haqda bu gün, 22 iyun tarixində Bakuplus.az Baku TV-yə istinadən məlumat verir.
Sakinlərin sözlərinə görə, binaların təmiri zamanı ərazidə 3 konteyner quraşdırılıb, birinin divarı kərpiclə üzlənib və ərazidə işləyən fəhlələr bu tikintinin müvəqqəti olduğunu bildiriblər. Lakin sakinlərə heç bir rəsmi sənəd təqdim edilməyib.
“Qanunsuz tikili ilə yaşayış binası arasında ara məsafəsi gözlənilməyib. Pəncərəni açanda divarla qarşılaşıram. Evə işıq, hava girmir”, – deyə vətəndaşlar şikayət edirlər.
Ərazidə çəkiliş aparılan zaman təmir işlərini həyata keçirən şəxslərə rəhbərlik edənlərlə əlaqə saxlamaq mümkün olmayıb.
Jurnalistlər tərəfindən Xətai RİH-yə 13 iyun 2024-cü il tarixindən dəfələrlə sorğu ünvanlansa da, 21 iyun tarixinə qədər hər hansı bir cavab gəlməyib.
