Bakının Xətai və Nizami rayonlarında məcburi köçkünlər yaşayan yataqxanalar qəzalı vəziyyətdədir və dağılmaq təhlükəsindədir. Bu haqda bu gün, 21 noyabr tarixində Bakuplus.az ATV News-a istinadən xəbər verir.
Xətai rayonu, Neapol, 24 ünvanında yerləşən yataqxananın sakinləri hər an tikilinin uçacağından ehtiyat edirlər. Həmçinin onlar bildiriblər ki, həmin yataqxanada 60-dan çox məcburi köçkün yaşayır və bina qəzalı olanlar siyahısına salınsa da, onlar indiyədək oradan köçürülməyib.
Xətai rayonu Mənzil-Kommunal Təsərrüfat Birliyinin baş mühəndisi Sahib Babayev bildirib ki, bu binanın tikintisi 1992-ci ildə başlanıb və yarımçıq dayandırılıb. Əlavə olaraq bina 11 saylı mədənin məişət tikinti tresti tərəfindən inşa olunub və yataqxana heç bir qurumun balansına verilməyib.
Qaçqın və Məcburi Köçkünlərin işləri üzrə Dövlət Komitəsindən qeyd edilib ki, təhlükə altında olan binada məskunlaşan məcburi köçkünlərin vəziyyəti ilə bağlı xəbərdardırlar və qurumun nümayəndələri artıq baxış keçiriblər. Hazırda Dövlət Komitəsinin mənzil fondunda boş yaşayış sahələri olmadığına görə binada yaşayan sakinlər üçün mənzillər yalnız işğaldan azad olunmuş ərazilərdə tikilir. Məcburi köçkünlərin öz doğma torpaqlarına mərhələli qayıdışı zamanı ilk növbədə ən ağır vəziyyətdə yaşayanlar, eyni zamanda Xətai rayonu, Neapol, 24 ünvanında müvəqqəti məskunlaşmış məcburi köçkünlər yeni yaşayış sahələri ilə təmin olunacaqlar.
Nizami rayonu, Keşlə qəsəbəsi, Yavər Səfərov küçəsində yerləşən ikimərtəbəli bina da qəzalı vəziyyətdədir. Həmin binada 20 ailə yaşayır.
“Təmir işlərinin həmin binalarda aparılması səmərəli hesab olunmur. Yaşayışın yaxşılaşdırılması üçün sahibkarlara da təklif olunur ki, onlar da orada xüsusi sərəncamla sakinlərin köçürülməsini və gələcəkdə mənzil ilə təmin olunmasını həyata keçirsinlər”, – deyə Nizami rayonu Mənzil-Kommunal Təsərrüfat Birliyinin baş mühəndisi Bayram Bayramov bildirib.
Əlavə olaraq baş mühəndis məlumat verib ki, həmin yataqxanalarda gələcək zamanda müvəqqəti təmir işləri aparılacaq.
