Paytaxtın Xəzər və Sabunçu rayonlarında qaz xətlərində qanunsuz birləşmələr aşkarlanıb. Bu haqda 14 dekabr tarixində Azəriqaz İB-nın mətbuat xidməti məlumat yayıb.
Rayonların ərazisində sayğac olmadan qaz xəttinin rezin borular vasitəsilə çəkilməsi, sayğac göstəricisinin geri çəkilməsi, pərakəndə şəkildə qaz xətlərindən istifadə halları müəyyən edilib.
“Abonentlərlə maarifləndirici söhbətlər aparılmasına baxmayaraq, əfsuslar olsun ki, hələ də bəzi vətəndaşlar qanunsuz əməllərindən çəkinmirlər.” - deyə videomüraciətdə bildirilib.
Kustar üsulla edilən bu birləşmələr ətrafdakı insanların da həyatını təhlükəyə atır. Müraciətdə qeyd olunub ki, bu cür qanunsuz hərəkətlərə yol verən şəxslər barədə daha ciddi tədbirlər görüləcək.
