Bakının Nizami rayonu, Şərifli küçəsi 25 ünvanında 1 hektara yaxın ərazi uzun müddətdir ki, hasarlanıb. Ərazidə olan ağaclara laqeyd münasibət sakinləri narahat edir. Onlar, hasara alınmış ərazidə ağacların qurumaq təhlükəsi olduğunu və bunun məqsədli şəkildə edildiyini deyirlər. Bu haqda bu gün, 25 may tarixində ATV Xəbər reportaj yayıb.
Hasarlanan ərazidə 100-dən çox ağac var. Sakinlərin sözlərinə görə, bu ağaclar iki ildir ki suvarılmır və onlara lazımi qulluq göstərilmədiyinə görə artıq bir neçəsi qurumaq üzrədir. Bu hal davam edərsə, qurumuş ağacların sayı daha da çox olacaq.
Məsələ ilə bağlı Nizami Rayon İcra Hakimiyyətindən bildirildi ki, hasarlanan ərazi özəl mülkiyyətdə olan yerdir. Tikinti məcəlləsinə əsasən mülkiyyətdə, icarədə və ya istifadədə olan torpaq sahəsinə hündürlüyü 2,2 metr olan qonşu torpaq sahəsi ilə sərhəddə və ya küçə boyunca çəkilən hasarlara icazə tələb olunmur. Həmin ərazidə ağacların kəsilməsi və tikinti işlərinin aparılması faktı aşkar olunmayıb. Yaşıllıqların mühafizəsi aidiyyəti qurumlarla birlikdə rayon rəhbərliyinin nəzarətindədir.
Lakin bu cavab sakinləri qane etmir. Sakinlər deyir ki, əvvələrdə bu təcrübədən geniş istifadə olunub - ağaclar hasara alınır, yaşıllıqlar qurudulur, sonra kəsilərək məhv edilir. Sonra isə həmin ərazidə, fərdi yaşayış evləri və ya hündürmərtəbəli binalar tikilir.
