Paytaxt ərazisində sakinlər binalarının bloklarının yararsız vəziyyətdə olmasından narazıdırlar. Bu haqda bu gün, 28 iyun tarixində Bakuplus.az Xəzər Xəbər-ə istinadən məlumat verir.
Vətəndaşların sözlərinə görə, sözügedən binaların girişindəki divarlar dağılır, pilləkənlər tökülür. Girişdə qapılar olmadığına görə isə tez-tez oğurluqlar olur.
“Əksər vaxt biz qonşularla yığışıb öz hesabımıza bərpa edirik, boya vururuq. Mənzil Kommunal İstismar Sahəsi tərəfindən heç kim etmir, əslində onlar baxmalıdılar”, – deyə sakinlər şikayət edirlər.
Əmlak məsələləri üzrə ekspert Elşad Əliyevin sözlərinə görə, blokların təmiri Mənzil-Kommunal İstismar Sahəsi tərəfindən aparılmalıdır, lakin həmin qurumların maddi vəsaitləri limitli olduğuna görə, hər dəfə zəruri məbləği ayıra bilmirlər. Bu səbəbdən vətəndaşlar yerli icra nümayəndəliklərinə müraciət etməlidirlər.
“Binalar mütəmadi olaraq yoxlanılmalıdır. Binada hər hansı nəm çəkmək ehtimalı olur, subasma ehtimalı olur. Yeni tikililərdə dərhal tədbir görülür. Köhnə tikililərdə də sakinlərin deməklərini gözləməməlidirlər”, – deyə E.Əliyev bildirib.
