Xəzər rayonu, Buzovna qəsəbəsinin Albalılıq yaşayış massivində yerləşən 340 nömrəli körpələr evi-uşaq bağçasında valideynlərdən hər uşağa görə aylıq 30 manat tələb edilir. Bu haqda bu gün, 17 oktyabr tarixində Bakuplus.az ARB Xəbər-ə istinadən məlumat verir.
Çəkiliş qrupu həmin bağçaya müraciət etsə də, rəhbərlikdən heç bir cavab almaq mümkün olmayıb.
Ekspertlər deyirlər ki, dövlətin məktəbəqədər təhsil müəssisələrindən aylıq ödəniş tələb edənlər hər zaman olub.
“Məktəbəqədər təhsil müəssisələri Elm və Təhsil Nazirliyinin tebeliyinə verildikdən sonra istər metodik baxımdan, istərsə də kadrların təminatı baxımından, həm də təminat baxımından müsbət mənada ciddi dəyişikliklər var. Bütün bunların fonunda valideynlərdən hər hansı ödənişlərin tələb olunması qeyri-qanunidir, yolverilməzdir”, – deyə təhsil ekspetri Elşən Qafarov bildirib.
Elm və Təhsil Nazirliyindən də deyilir ki, dövlət bağçaları pulsuzdur. Heç bir müəssisə rəhbəri valideynlərin qarşısına belə bir tələb qoya bilməz. Bu məsələ yalnız məktəbəqədər təhsil müəssisələrinin daxili nizamlanmasına uyğun formada könüllü prinsipi ilə həyata keçirilir.
“Bağçanın müəyyən problemləri ola bilər. Məsələn əlavə dərnəklər yaradıla və yaxud hansısa resursların alınması lazım ola bilər, ya da qapının dəstəyi qırıla bilər. Müxtəlif səbəblərə görə maliyyə xərcləri yaranır”, – deyə Elm və Təhsil Nazirliyinin sektor müdiri İlahə Rəsulova açıqlama verib.
Bəs dövlət bu cür çatışmazlıqları aradan qaldırmır ki, valideynlər özləri könüllü şəkildə iştirak etməlidirlər?
“Yox, qaldırır. Əlbəttə ki, dövlət resurslarla təmin edir, istər yuyucu vasitələr, istər dəftərxana ləvazimatları olsun. Dövlət lazımi xərcləri qarşılasa da, burada tezlik məsələsi da var. Yenə də deyirəm, bağçanın özünün müəyyən qayğıları var”, – deyə Rəsulova əlavə edib.
Elm və Təhsil Nazirliyindən o da deyildi ki, əgər hər hansı bağça rəhbərliyi valideynlərdən məcburi ödəniş tələb edərsə, onlar dərhal qurumun 146 nömrəli qaynar xəttinə zəng edib, məlumat verə bilərlər.
