Bakıda 14-17 noyabr tarixlərində 25-ci Beynəlxalq Biznes Forum (İnternational Business Forum - IBF) keçiriləcək. Bu haqda İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA) məlumat yayıb. Forum Agentliyin və Türkiyənin Müstəqil Sənayeçi və İş Adamları Dərnəyinin (MÜSİAD) təşkilatçılığı ilə baş tutacaq.
Tədbirin keçirilməsində məqsəd ölkələr arasında ikitərəfli iqtisadi-ticarət əlaqələrinin inkişaf etdirilməsi, investisiya sahəsində əməkdaşlıq və biznes əlaqələrinin möhkəmləndirilməsidir. Bu məqsədlə bir sıra konfranslar, ölkə təqdimatları, ikitərəfli görüşlər, sərgilər və digər tədbirlər keçiriləcək.
KOBİA-nın İdarə Heyətinin sədri Orxan Məmmədov və IBF-in prezidenti Türkiyədə MÜSİAD-ın qurucu rəhbəri Erol Yararla görüşüb. KOBİA və MÜSİAD arasında yeni əməkdaşlıq istiqamətlərinə dair də fikir mübadiləsi aparılıb.
Tədbir çərçivəsində Azərbaycanın əlverişli biznes və investisiya mühitinin xarici investorlara tanıdılması, iş adamları arasında birbaşa biznes əlaqələrinin qurulması, Qarabağın investisiya imkanları barədə təqdimatın keçirilməsi də nəzərdə tutulur.
