Paytaxt yollarının ara-sıra çökməsinə rast gəlinir. Bir neçə gün öncə Bakının Nizami rayonu, Rüstəm Rüstəmov küçəsində yol çöküb. Sakinlər isə sözügedən yolun yenicə asfaltlandığını deyiblər.
Qeyd edək ki, bu ilk yol çökməsi deyil. Təqribən 10 gün öncə də “İçərişəhər” stansiyasının yaxınlığında analoji hadisə baş verib.
Oxşar hadisə iyul ayında Nəriman Nərimanov rayonu, Ceyhun Hacıbəyli küçəsində də qeydə alınıb. Belə ki, ki yolun çökməsi səbəbindən nəqliyyatın hərəkəti çətinləşib.
Siyahını uzada bilərik...
Bəs yolların son vaxtlar və tez zamanda sıradan çıxmasına səbəb nədir?
Mövzu ilə bağlı bizim.media-ya danışan nəqliyyat məsələləri üzrə ekspert Aslan Əsədov bildirilib ki, yamaclarda yol salınarkən bütün normativlərə riayət etmək lazımdır:
“Sözügedən küçələr əsasən şəhərin yamaclarında Sovet dönəmində salınmış yollardır. Bu küçələrin ətrafında binalar inşa olunub, yeni kanalizasiya xətləri çəkilib, müxtəlif yol-yataq işləri görülüb. Bu da əlavə problem yaradır.
Nəqliyyat vasitələri istiqamət olaraq hansı ərazilərə gedirsə, o ərazidə ümumi torpaq yatağının möhkəmləndirilməsi, bəndləndirilməsi və əgər yamacdadırsa, sağında ən azından ağacların əkilməsi yol infrastrukturunda nəzərə alınmalıdır. Yoxsa həmin yol infrastrukturunun keyfiyyətindən söhbət gedə bilməz”.
