Bakının Xətai rayonunda yük maşınları qadağan olunmuş saatlarda sərbəst hərəkət edir. Bu haqda bu gün, 8 avqust tarixində Bakuplus.az Oxu.az-a istinadən məlumat verir.
Afiyəddin Cəlilov və Ayaz İsmayılov küçələrinin kəsişməsində çəkilən görüntülərdə gündüz saatlarında yük maşınlarının şəhərdə hərəkəti əks olunub.
Məsələ ilə bağlı Bakı şəhər Baş Polis İdarəsinin Dövlət Yol Polisi İdarəsinin inspektoru, polis mayoru Fuad Sultanov qeyd edib ki, artıq bu avtomobilləri idarə edən tikinti şirkətinin “Space” MMC olduğu müəyyən edilib.
“Görüntülərdən məlumatımız var. Əraziyə idarənin aidiyyəti əməkdaşları ayrılıblar. Barələrində müvafiq tədbirlər görülüb, inzibati protokollar tərtib olunub”, - deyə Sultanov əlavə edib.
Nazirlər Kabineti yanında Yol hərəkətinin təşkili, tənzimlənməsi və təhlükəsizliyi üzrə Komissiyanın həyata keçirdiyi tədbirlərdən biri kimi, 27 oktyabr 2022-ci il tarixindən xüsusi təyinatlılar istisna olmaqla, yükgötürmə qabiliyyəti 8 tondan artıq olan yük avtomobillərinin saat 07:00-dan 22:00-dək, yanacaq daşıyan avtomobillər üçün isə saat 06:00-dan 00:00-dək Bakıya girişi qadağan edilib. Müəyyən olunmuş vaxtda Bakıya daxil olan yük maşınları şəhəri vaxtında tərk etməlidir. Həmin qayda xüsusi təyinatlı, o cümlədən qəza-bərpa və xilasedici nəqliyyat vasitələrinə tətbiq edilmir.
